سال کا بہترین نیوزی لینڈر، انگلش کھلاڑی بین اسٹوکس

انگلش کرکٹر بین اسٹوکس نے کہا ہے کہ انہیں انتہائی خوشی ہے کہ انہیں سال کا بہترین نیوزی لینڈر قرار دیا گیا ہے لیکن ان کے خیال میں یہ اعزاز نیوزی لینڈ کی قومی کرکٹ ٹیم کے کپتان کین ولیمسن کو ملنا چاہیے تھا۔

بین اسٹوکس نیوزی لینڈ میں پیدا ہوئے تھے۔ ان کے والد کو انگلینڈ میں رگبی ٹیم کی کوچنگ کی ملازمت ملی تو وہ اپنی فیملی سمیت انگلینڈ منتقل ہو گئے تھے۔ تب بین اسٹوکس کی عمر صرف بارہ برس تھی۔ اسٹوکس کے کنبے کا تعلق نیوزی لینڈ کی قدیم مقامی ماؤری برادری سے ہے۔

بین اسٹوکس نے اپنا بین الاقوامی کرکٹ کیریئر انگلش ٹیم کے ساتھ شروع کیا اور جلد ہی انہوں نے اپنی آل راؤنڈ صلاحیتوں سے اپنا لوہا منوا لیا۔ حالیہ کرکٹ ورلڈ کپ میں اٹھائیس سالہ بین اسٹوکس نے عمدہ کارکردگی کا مظاہرہ کیا اور فائنل میچ میں اپنے آبائی ملک نیوزی لینڈ کے خلاف ان کی بلے بازی شاندار رہی، جس کی وجہ سے انگلش ٹیم ورلڈ کپ جیتنے میں کامیاب ہوئی تھی۔

سال دو ہزار انیس کے بہترین نیوزی لینڈر ہونے کا اعزاز ملنے پر اسٹوکس نے عاجزانہ رویہ اختیار کرتے ہوئے کہا کہ وہ بہت خوش ہیں، ''مجھے اپنے نیوزی لینڈر اور ماؤری ورثے پر فخر ہے۔ لیکن مجھے اس معتبر اعزاز سے نوازا جانا زیب نہیں دیتا۔‘‘

بین اسٹوکس نے مزید کہا کہ نیوزی لینڈ میں ایسے بہت سے لوگ ہیں جو اس انعام کے حق دار ہیں اور انہوں نے نیوزی لینڈ کے لیے بہت کچھ کیا ہے۔ انہوں نے کہا کہ حقیقی طور پر کیوی لیجنڈ کرکٹر کین ولیمسن اس اعزاز کے مستحق تھے، ''وہ (عالمی کپ کے) مین آف دا ٹورنامنٹ تھے اور ایک پرتاثر لیڈر بھی۔‘‘

ع ب / م م / خبر رساں ادارے