صدارتی انتخابات مقررہ وقت پر ہی ہوں گے

پاکستان کی وفاقی وزارت قانون نے گزشتہ ہفتے الیکشن کمیشن کو ایک خط ارسال کیا تھا جس میں کہا گیا تھا کہ رمضان کے آخری عشرے کے سبب متعدد ارکان پارلیمان چھ اگست کو عمرے اور اعتکاف جیسی عبادات میں مصروف ہوں گے لہذا انتخابات کو اس ماہ کے آخر تک ہی کرا لیا جائے۔ تاہم پیر کے روز الیکشن کمیشن کے ایک ترجمان کے مطابق ارکان کی اکثریت نے وزارتِ قانون کے اس خط کو مسترد کر دیا ہے اور کہا ہے کہ صدارتی انتخابات وقت پر ہی ہونے چاہییں۔

الیکشن کمیشن کی طرف سے جاری کردہ شیڈول کے مطابق صدارتی امیداور 24 جولائی تک کاغذاتِ نامزدگی داخل کرائیں گے جب کہ 26 جولائی کو ان کاغذات کی جانچ پڑتال کی جائے گی اور 29 جولائی تک کاغذات واپس لیے جا سکیں گے۔

انتخابات کی تاریخ کا اعلان ہونے کے باوجود حکمران جماعت مسلم لیگ (ن) اپنے صدارتی امیدوار کے نام کا اعلان نہیں کر سکی جب کہ دوسری جانب اپوزیشن جماعتیں بھی اب اتک متفقہ صدارتی امیدوار لانے میں کامیاب نہیں ہو سکیں۔

حزبِ اختلاف کی بڑی جماعت پاکستان پیپلز پارٹی نے سنیٹر رضا ربانی کو اپنا صدارتی اُمیدوار نامزد کیا ہے جب کہ پاکستان تحریک انصاف کی جانب سے جسٹس وجیہ الدین کو صدارتی امیدوار منامزد کیا گیا ہے۔ پیپلز پارٹی کے رہنما اور سابق وزیر اطلاعت قمر زمان قائرہ کا کہنا ہے کہ اپوزیشن جماعتوں کا متفقہ امیدوار لانے کے لیے دیگر جماعتوں کے ساتھ رابطے جاری ہیں ۔انہوں نے کہا کہ مسلم لیگ (ن) کو چاہیے کہ وہ رضا ربانی کی جمہوریت کے لیے خدمات کو سامنے رکھتے ہوئے انہیں صدر کے لئے منتخب کروائے۔ ڈوئچے ویلے سے بات کرتے ہوئے انہوں نے کہ کہ میاں رضا ربانی نے وفاق سے اختیار لے کر صوبوں کو دیے۔ ’’میں سمھجتا ہوں کہ مسلم لیگ (ن) کو آج ایک ایسے ہی شخص کو وہاں لانا چاہیے جو بہت اچھا کام کرتا رہا ہے، بہت اعلیٰ ترامیم کی ہیں اور جب وہ وہاں بیٹھیں گے تو یقینا اسحاق ڈار صاحب اور رضا ربانی صاحب جیسے لوگ ہمارا اثاثہ ہیں۔‘‘

پاکستانی آئین کے مطابق صدارتی عہدے کی مدت ختم ہونے سے ایک ماہ قبل صدارتی انتخابات کروانا لا زمی ہے۔ موجودہ صدر آصف علی زرداری کے عہدے کی میعاد آٹھ ستمبر کو ختم ہور ہی ہے۔

خیال رہے کہ اس مرتبہ صدارتی انتخابات میں امیدواروں پر نا اہلی کی آئینی شقوں باسٹھ اور تریسٹھ کا اطلاق بھی ہوگا۔ اس کے لیے الیکشن کمیشن کی جانب سے صدارتی امیدواروں کو ایک ایک حلف نامہ بھجوایا جائے گا جس میں امیدوار کو ملکی آئین کے آرٹیکل باسٹھ اور تریسٹھ کے تحت اپنی اہلیت ثابت کرنا ہوگی۔ اس بارے میں وضاحت کرتے ہوئے سابق قائم قام صدر اور قانون دان وسیم سجاد نے ڈوئچے ویلے کو بتایاکہ آئین کا آرٹیکل باسٹھ اہلیت کے بارے میں ہے اور آرٹیکل تریسٹھ ناہلی کے بارے میں ہے۔ ’’صدر کی اہلیت کے بارے میں لکھا ہوا ہے کہ صدر رکن پارلیمنٹ بننے کا اہل ہونا چاہیے، وہاں نااہلی کے بارے میں ذکر نہیں ہے۔ اس لیے سپریم کورٹ کا ایک فیصلہ آیا کہ صدر پر آرٹیکل باسٹھ کا اطلاق تو ہوتا ہے تریسٹھ کا نہیں ہوتا۔ بعد میں جو وضاحتیں آئی ہیں، اور مختلف فیصلے آئے ہیں، اس کے تحت اب قانون یہ ہے کہ دونوں آرٹیکل قابل اطلاق ہیں لہذا الیکشن کمیشن نے اس کی وضاحت کی ہے۔"

سابق صدر جنرل پروہز مشرف نے تین نومبر دو ہزار سات کو ماورائے آئین اقدامات کرنے کے بعد خود کو صدر منتخب کرانے کے لیے صدارتی انتخابات سے امیدوار کی نا اہلی کی شق ایک خفیہ ترمیم کے ذریعے نکال دی تھی۔