’فرزند روس‘ جاسوس، امریکی فوجی افسر پر فرد جرم عائد

امریکی وزارتِ انصاف کے مطابق جس فوجی پر جاسوسی کی فرد جرم عائد کی گئی ہے، اس کا نام پیٹر رافائل ڈزیبنسکی ڈیبینز ہے اور اس کی عمر پینتالیس برس ہے۔ استغاثہ کا کہنا ہے کہ اس فوجی افسر نے ایک دہائی سے زائد عرصے تک اہم فوجی راز روس کو فراہم کرنے کا سلسلہ جاری رکھا۔ استغاثہ کے بیان میں واضح کیا گیا کہ ڈیبینز خفیہ روسی ایجنٹوں کے سامنے فخر سے اظہار کرتا تھا کہ وہ ''فرزند روس‘‘ ہے۔

مزید پڑھیے: جاسوسی کا الزام: امريکی شہری کو روس ميں 16 برس قيد کی سزا

امریکا میں پیدا ہونے والے سابق فوجی افسر ڈیبینز کو روسی خفیہ ادارے نے سن 1996 میں امریکی فوج کی معلومات فراہم کرنے کی ذمہ داری تفویض کی تھی، حالانکہ وہ اس وقت امریکی فوج کا ملازم بھی نہیں تھا۔ اس طرح سے روسی خفیہ ایجنٹوں نے ایک نوجوان طالب علم کو خفیہ سرگرمیوں کے لیے تیار کرنا شروع کر دیا تھا۔ یہ ذمہ داری ملنے کے بعد ڈیبینز نے کئی مرتبہ روس کے دورے بھی کیے۔ یہ امر اہم ہے کہ سابق امریکی فوجی افسر کی والدہ روس سے تعلق رکھتی تھیں۔ استغاثہ کے مطابق سن 2011 تک ڈیبینز روسی ایجنٹوں کو حساس معلومات فراہم کرنے کا سلسلہ جاری رکھے ہوئے تھا۔

عدالت میں جمع کردہ دفتر استغاثہ کی فرد جرم میں بیان کیا گیا کہ فوجی افسر ڈیبینز کا خیال تھا کہ ساری دنیا پر امریکی اجارہ داری اور تسلط غیرمعمولی ہے اور اس میں کمی وقت کی ضرورت ہے۔ یہ بھی بتایا گیا کہ ڈیبینز امریکی فوج میں شمولیت کے کچھ ہی عرصے بعد اسے خیرباد کہنا چاہتا تھا لیکن روس کے خفیہ ایجنٹوں کی ہدایت پر اس نے اپنی فوجی ملازمت کا سلسلہ جاری رکھا۔

یہ بھی پڑھیے: مراکش: جاسوسی اور جنسی زیادتی کے الزام میں صحافی گرفتار

مبینہ امریکی جاسوس پیٹر رافائل ڈزیبنسکی ڈیبینز نے امریکی اسپیشل فورسز المعروف 'گرین بیرٹس‘ میں شمولیت سن 2001 میں اختیار کی تھی۔ ملازمت کے دو برسوں بعد اس کو ترقی دے کر کیپٹن بنا دیا گیا۔ اپنی ملازمت کو دوران سکیورٹی کلیئرنس کے بعد اس کی تعیناتی پہلے جرمنی اور پھر وسطی ایشیائی ریاست اور سابق روسی جمہوریہ آذربائجان میں کی گئی تھی۔

استغاثہ کے مطابق ڈینینز نے فوج کی ملازمت سن 2005 میں ختم تو کر دی تھی لیکن روسی خفیہ اداروں کے ساتھ روابط بدستور قائم رکھے اور آخری رابطہ سن 2011 میں ہوا تھا۔ امریکی تفتیشی ادارے ایف بی آئی کے کاؤنٹر انٹیلیجنس افسر ایلن کوہلر کا کہنا ہے کہ ایک فوجی افسر کی حیثیت سے جاسوسی کا ارتکاب کر کے ڈیبینز نے اپنے ملک اور ساتھی فوجیوں کے ساتھ بدعہدی اور دھوکا کیا تھا۔

مزید پڑھیے: نقد رقوم کے اسمگلروں کو ایئر پورٹ پر پکڑوانے والا جاسوس کتا

سن 2001 سے لے کر سن 2005 تک امریکی فوجی ڈیبینز کے ساتھ روس کے ایجنٹوں نے کئی مرتبہ ملاقاتیں کی تھیں۔ بیشتر ملاقاتیں روسی شہر چِیلیابنسک میں ہوئی تھیں۔ یہ روسی شہر مبینہ امریکی جاسوس کی زندگی میں انتہائی اہمیت کا حامل رہا ہے۔ استغاثہ مبینہ جاسوسی کے الزامات ثابت کرنے میں کامیاب ہو گیا تو سابق امریکی فوجی افسر پیٹر رافائل ڈزیبنسکی ڈیبینز کو عمر قید سنائی جا سکتی ہے۔

کوہِ یورال کے نزدیک وسطی مغربی روس کے شہر چِیلیابنسک کی یونیورسٹی میں تعلیم حاصل کرنے کے دوران ہی ڈیبینز کی مبینہ ملاقاتیں روسی ایجنٹوں سے شروع ہوئی تھیں۔ سن 1997 میں اس کی شادی ایک روسی فوجی افسر کی بیٹی سے ہوئی۔

ع ح، ع آ (اے ایف پی، اے پی)