لندن کے خلاف سکاٹ لینڈ اور ویلز کی اختیارات کی جنگ ابھی سے

برطانیہ میں سکاٹ لینڈ کے دارالحکومت ایڈنبرا سے بدھ اٹھائیس فروری کو ملنے والی نیوز ایجنسی روئٹرز کی رپورٹوں میں بتایا گیا ہے کہ سکاٹ لینڈ اور ویلز کی حکومتوں نے کل منگل ستائیس فروری کو کہا کہ وہ بریگزٹ کے بعد اختیارات کی تقسیم کے حوالے سے ابھی سے اپنے اپنے علاقائی پارلیمانی اداروں میں چند خاص قانونی مسودے منظوری کے لیے پیش کر دیں گی۔

یورپی یونین کی صدارت چھ ماہ کے لیے بلغاریہ کے پاس

بریگزٹ سے متعلق سکاٹش عدالت کا فیصلہ اگلے ہفتے

علاقائی سطح پر نئی قانون سازی کی ان کوششوں کی وجہ وہ اختیارات ہیں جو مارچ 2019ء کے آخر تک برطانیہ کے یورپی یونین چھوڑ دینے کے بعد برسلز سے واپس برطانیہ کو مل جائیں گے لیکن سکاٹ لینڈ اور ویلز کی علاقائی حکومتیں نہیں چاہتیں کہ یہ اختیارات پھر لندن کے پاس چلے جائیں۔ اس کے برعکس ایڈنبرا اور کارڈیف میں حکومتوں کی خواہش ہے کہ یہ اختیارات انہیں ملنا چاہییں۔

روئٹرز کے مطابق سکاٹ لینڈ اور ویلز کے پارلیمانی اداروں میں ان مجوزہ قانونی مسودوں پر بحث آئندہ چند دنوں میں شروع ہو تو جائے گی، لیکن یہی پیش رفت خود لندن میں ملکی حکومت کے لیے ایک نیا دردسر بھی بن جائے گی۔

بریگزٹ معاہدہ ترکی اور یوکرائن کے لیے ماڈل ہو سکتا ہے، جرمنی

یورپی یونین ختم کی جائے، انتہائی دائیں بازو کی یورپی جماعتیں

برطانیہ میں ملکی سطح پر لندن کے ساتھ ساتھ ایڈنبرا اور کارڈیف کی علاقائی سطح پر طاقت کے جائز مرکز بننے کی اس جمہوری خواہش کا نقصان یہ ہو گا کہ اس سے نہ صرف برطانیہ کی داخلی سیاست میں یقینی طور پر ایک نئی رسہ کشی شروع ہو جائے گی بلکہ اس سے بریگزٹ کا عمل بھی نئی پیچیدگیوں کا شکار ہو جائے گا، جو یونین کی رکنیت کے خاتمے سے متعلق لندن اور برسلز کے مابین طویل اور بہت مشکل مذاکراتی عمل کو بھی متاثر کرے گا۔

لندن کی برطانیہ کے اندر ہی ایڈنبرا اور کارڈیف کے ساتھ اختیارات کی تقسیم کی یہ نئی جنگ جن شعبوں کو سب سے زیادہ متاثر کرے گی، ان میں زراعت اور ماہی گیری کے شعبے بھی شامل ہوں گے۔ اس کا سبب یہ ہے کہ پوری یورپی یونین میں اس بلاک کے لیے طے کردہ مجموعی فریم ورک کے تحت زراعت اور ماہی گیری بھی متعلقہ رکن ممالک کے بجائے یونین ہی کی عمل داری میں آتے ہیں۔ لیکن جب برطانیہ میں ان امور کا نگران برسلز نہیں رہے گا تو متنازعہ سوال یہ ہو گا کہ پھر ان اور ایسے دیگر شعبوں میں فیصلہ سازی آئندہ لندن حکومت کرے گی یا پھر متعلقہ علاقائی حکومتیں۔

بریگزٹ مذاکرات میں اہم پیش رفت

بریگزٹ کے خلاف لندن میں ہزارہا شہریوں کا احتجاجی مظاہرہ

اس موضوع پر لندن حکومت سیاسی مصلحت پسندی کا مظاہرہ کرتے ہوئے سکاٹ لینڈ اور ویلز کو انتظامی رعایات دے تو سکتی ہے لیکن اس بات سے انکار بھی نہیں کیا جا سکتا کہ یہ عمل بہت صبر آزما ہو گا۔ جہاں تک خود برطانوی وزیر اعظم ٹریزا مے کا سوال ہے تو وہ یہ اشارے دے چکی ہیں کہ برطانوی ریاست کے مجموعی اتحاد اور وحدت کے تسلسل کے لیے مستقبل میں اختیارات اور عمل داری سے متعلق کچھ استثنائی فیصلے ممکن ہیں۔