لیبیا: قذافی کے حامیوں کے ہاتھوں مغربی سفارت خانے نذرِ آتش

مغربی دفاعی اتحاد نیٹو کے فضائی حملے میں لیبیا کے رہنما معمر قذافی کے سب سے چھوٹےانتیس سالہ بیٹے سیف العرب قذافی کے ہلاک ہونے کی تصدیق تو نہیں ہو سکی ہے تاہم اس واقعے کے بعد قذافی نے اپنے خلاف برسرِ پیکار باغیوں کے خلاف جارحانہ حملے شروع کردیے ہیں۔

آج پیر کو طرابلس میں نیٹو حملے میں ہلاک ہونے والے قذافی کے بیٹوں اور پوتوں کی تدفین کی جا رہی ہے۔ جس وقت طرابلس میں نیٹو نے فضائی حملہ کیا اور میزائل گرائے گئے اس وقت قذافی طرابلس میں ہی تھے۔

دوسری جانب قذافی کی فورسز نے لیبیا کے اہم شہر مصراتہ پر بمباری شروع کر دی ہے۔ مصراتہ پر اس وقت باغیوں کا قبضہ ہے۔ قذافی کے حامیوں نے مصراتہ کی بندرگاہ پر حملے کیے ہیں۔ باغیوں کا کہنا ہے کہ بندرگاہ پر حملہ کرنا ان کی ’لائف لائن‘ کو نقصان پہنچانے کی کوشش ہے۔

دریں اثناء قذافی کے حامیوں نے مغربی ممالک کے سفارت خانوں کو نذرِ آتش کیا ہے۔اس کے علاوہ قذافی کے حامیوں نے اقوامِ متحدہ کے دفاتر کو بھی نقصان پہنچایا ہے۔ اقوامِ متحدہ نے طرابلس سے اپنے عملے کو واپس بلا لیا ہے۔

اُدھر برطانوی دفتر خارجہ کی ایک خاتون ترجمان نے اتوار کو ایک بیان میں کہا تھا کہ اُن کی حکومت اس خبر کی بھی چھان بین کر رہی ہے کہ طرابلس میں برطانیہ کے سفارتی اہلکاروں کی رہائش گاہ ایک حملے میں تباہ ہوگئی ہے۔ انہوں نے کہا کہ اُن کے خیال میں دیگر ملکوں کے سفارتکاروں کی رہائش گاہوں پر بھی حملے ہوئے ہیں اور اُن کی عمارتیں بھی تباہ ہوئی ہیں۔ عینی شاہدین کے مطابق اٹلی کے سفارت خانے کی عمارت سے بھی دھواں اٹھتا دیکھا گیا ہے۔

رپورٹ: شامل شمس⁄ خبر رساں ادارے

ادارت: عابد حسین