لیبیا: ساحلی شہر سرت پر جنرل حفتر نے قبضہ کر لیا

سرت کا کنٹرول سنبھالنے کا اعلان جنرل حفتر کی لیبین نیشنل آرمی کے ایک ترجمان نے مشرقی شہر بن غازی میں پریس کے سامنے کیا۔ احمد المسماری نے کہا کہ ان کی فورسز نے بڑی تیزی سے شہر فتح کیا اور اس آپریشن میں محض تین گھنٹے لگے۔ انہوں نے کہا کہ لیبین نیشنل آرمی نے زمینی اور سمندری محاذوں سے شہر پر چڑھائی کی اور اس دوران انہیں فضائی تحفظ حاصل رہا۔

ٹی وی پر اپنے بیان میں میں انہوں نے اعلان کیا کہ "سرت کو پوری طرح آزاد کرالیا گیا ہے۔"

سن دو ہزار چھ سے سرت شہر پر دارالحکومت طرابلس میں قائم اقوام متحدہ کی حمایت یافتہ یونٹی گورنمنٹ کی حامی ملیشیا کا کنٹرول رہا ہے۔

 

سرت لیبیا کے سابق حکمران کرنل قذافی کا آبائی شہر ہے، جنہیں دو ہزار گیارہ میں حکومت مخالف ملیشیا نے نیٹو افواج کی مدد سے اقتدار سے علیحدہ کر کے  قتل کر دیا تھا۔

تجزیہ کاروں کے مطابق سرت کا کنٹرول جنرل حفتر کی اہم کامیابی ہے۔ جنرل حفتر نے دسمبر میں اعلان کیا تھا کہ ان کی فوجی پیش قدمی کا ہدف دارالحکومت طرابلس ہے۔

مشرقی لیبیا میں جنرل حفتر کے زیر کنٹرول فورسز کو متحدہ عرب امارات، مصر، فرانس اور روس کی حمایت حاصل ہے۔ جبکہ طرابلس میں قائم حکومت کو ترکی، قطر اور اٹلی کی پشت پناہی حاصل ہے۔

حالیہ دنوں میں ترکی نے طرابلس حکومت کو مضبوط کرنے کے لیے اپنی فوجی تعیناتی کا آغاز کر دیا جس پر یورپی ممالک نے تشویش کا اظہار کیا ہے۔

یورپی یونین نے خبردار کیا ہے کہ آنے والے دنوں میں طرابلس اور اس کے آس پاس کے علاقے میں پر تشدد کارروائیاں بڑھ سکتی ہیں۔

ادھر لیبیا کے لیے اقوام متحدہ کے خصوصی ایلچی غسان سلامۃ نے ملک میں بیرونی مداخلت پر غم و غصے کا اظہار کیا ہے۔ ایک بیان میں انہوں نے کہا کہ ہر کوئی لیبیا کی بات کر رہا ہے لیکن کم لوگ لیبیا کے عوام کی بات کر رہے ہیں۔ انہوں نے کہا کہ دیگر ملکوں کو لیبیا میں مداخلت سے گریز کرنا چاہئیے کیونکہ "لیبیا میں پہلے ہی ہتھیاروں کی کثرت ہے۔"