مالدیپ میں صدارتی انتخابات کے لیے پولنگ روک دی گئی

ہفتے کے روز مالدیپ کی پولیس نے غیر جانب دار انتخابی کمیشن کے دفتر سے پولنگ اسٹیشنوں تک لے جائے جانے والے بیلیٹ پیپرز ضبط کر لیے۔ قبل ازیں الیکشن کمیشن نے دو صدارتی امیدواروں کی جانب سے انتخابات کو عدالت میں چیلنج کیے جانے کے باوجود رائے شماری طے شدہ وقت پر کرانے کا حکم دیا تھا۔ پولیس کے ترجمان عبداللہ نواز کا کہنا ہے کہ صرف ایک امیدوار نے رجسٹریشن کرائی تھی، جس کے بعد ووٹنگ کا عمل غیر قانونی ہو گیا تھا۔

گزشتہ ماہ انتخابات کے پہلے دور کے نتائج کو سپریم کورٹ نے بے ضابطگیوں کے الزام کے باعث منسوخ کر دیا تھا۔ اس دور میں سابق صدر محمد نشید کو پینتالیس فیصد ووٹ حاصل ہوئے تھے۔ مبصرین کے مطابق اس بات کے قوی امکانات موجود تھے کہ انتخابات کے دوسرے دور میں بھی نشید کو کامیابی مل جاتی۔

رائے شماری کے روکے جانے پر تبصرہ کرتے ہوئے الیکشن کمیشن کے چیئرمین فواد توفیق کا کہنا ہے، ’’ہم نے ووٹنگ کرانے کے لیے تمام تیاریاں کر لی تھیں تاہم پولیس نے ہم سے کہا کہ ووٹنگ کے سلسلے میں کوئی بھی دستاویزات کمیشن کے دفتر سے باہر نہیں جانی چاہیں۔‘‘

ووٹنگ کو رکوائے جانے کے فیصلے کا دفاع کرتے ہوئے عبداللہ نواز کا کہنا تھا کہ سپریم کورٹ کی ہدایات تھیں کہ اگر ایک ہی امیدوار ان انتخابات میں حصہ لے رہا ہو تو یہ عمل غیر قانونی ہو جاتا ہے۔

مالدیپ کی سیاست کئی برسوں سے بحران کا شکار ہے۔ سابق صدر نشید نے انتخابات کے پہلے دور میں پینتالیس فیصد کے لگ بھگ ووٹ تو حاصل کر لبے تھے تاہم سادہ اکثریت کے لیے انہیں کم از کم پچاس فیصد ووٹوں کی ضرورت تھی۔ مزید برآں، انتخابات کے نتائج کو بے ضابطگیوں اور دھاندلی کے الزامات کے باعث کالعدم ہی قرار دے دیا گیا۔

نشید کے حامی مالے میں ملکی پارلیمان کے سامنے دھرنا دیے ہوئے ہیں اور مسلسل احتجاج کر رہے ہیں۔ نشید کی ڈیموکریٹک پارٹی یا ایم ڈی پی نے انتخابات کو رکوائے جانے کو مالدیپ میں جمہوریت کے خلاف سازش قرار دیا ہے۔ اس حوالے سے ایم ڈی پی کے ترجمان حامد عبدالغفور کا کہنا ہے، ’’بین الاقوامی برادری کو اس حوالے سے مداخلت کرنا چاہیے تاکہ مالدیپ میں جمہوری تسلسل کو نقصان پہنچانے والی قؤتوں کے خلاف کارروائی کی جا سکے۔‘‘

رخصت ہونے والے صدر محمد وحید، محمد نشید کے پس رو ہیں۔ وہ انتخابات کے نئے دور سے دست بردار ہو گئے تھے۔ گزشتہ ماہ ہونے والی ووٹنگ میں وہ محض پانچ فیصد ووٹ حاصل کر پائے تھے۔