مغربی دنیا میں مذہب مسلسل پسپا ہوتا ہوا، جائزہ

میونسٹر کے مذہبی سماجیات کے ماہر ڈیٹلیف پولاک کے مرتب کردہ اس جائزے میں کہا گیا ہے کہ کلیسا کو چھوڑنے والوں کی تعداد میں مسلسل اضافہ ہو رہا ہے لیکن ایسے لوگ کسی طرح کی ٹھوس وجوہات کی بجائے اس لیے ایسا کر رہے ہیں کہ مذہب میں اُن کی دلچسپی ہی ختم ہوتی جا رہی ہے۔

جمعہ پندرہ مئی کو جاری کیے گئے اس جائزے میں کہا گیا ہے کہ کلیساؤں کی جانب سے شروع کیے گئے جوابی اقدامات بھی اس رجحان کے آگے بند باندھنے میں ناکام ثابت ہو رہے ہیں۔ جائزے کے مطابق کلیسا سے ہَٹ کر مغربی معاشروں میں موجود روحانی تحریکوں میں بھی دلچسپی بڑھنے کی شرح بہت کم ہو گئی ہے۔

اس جائزے میں بتایا گیا ہے کہ خوشحالی کی سطح میں اضافے اور بڑھتے ہوئے ثقافتی تنوع کے ساتھ ساتھ مسلسل بہتر ہوتے ہوئے سماجی اور تعلیمی نظام بھی لوگوں کی مذہبیت پر اثرات مرتب کر رہے ہیں۔ جائزے کے مطابق ہالینڈ جیسے کثیرالمذہبی ملک کے مقابلے میں پولینڈ، اٹلی اور آئر لینڈ جیسے مذہبی طور پر قدرے بند ملکوں میں مذہب کو اب بھی خاصی اہمیت دی جاتی ہے۔

اس جائزے میں کہا گیا ہے کہ اگر لوگ ایک کمیونٹی کے اندر رہتے ہوئے مذہب پر عمل پیرا ہوتے ہوں تو مذہب کی اہمیت پھر بھی بنی رہتی ہے۔ مزید یہ کہ کہ اگر مذہبی رجحانات کو سیاسی، قومی یا اقتصادی مفادات کے ساتھ موبوط کیا جاتا رہے تو بھی مذہب کے حوالے سے لوگوں کے طرزِ عمل پر مثبت اثرات مرتب ہو سکتے ہیں، جیسے کہ مثلاً امریکی صدر باراک اوباما نے بائبل پر حلف اٹھایا تھا یا جیسے کانگریس کے اندر دعا کی گئی تھی۔ تاہم دوسری طرف اس جائزے میں یہ بھی کہا گیا ہے کہ اگر مذہب اور سیاست ایک دوسرے کے حد سے زیادہ قریب آ جائیں تو لوگوں کی جانب سے مذہب کے خلاف مزاحمت بڑھ بھی جاتی ہے۔

اس جائزے میں کہا گیا ہے کہ ایسے خِطّوں میں، جہاں اقلیتوں کو کوئی دوسرا عقیدہ رکھنے والی اکثریت کے مقابلے پر اپنا آپ منوانا پڑتا ہے، مذہب کے ساتھ وابستگی زیادہ گہری ہو جاتی ہے۔

اس جائزے کی تیاری کے سلسلے میں ڈیٹلیف پولاک اور اُن کے ساتھی گیرگلی روسٹا نے اٹلی، ہالینڈ، جرمنی، پولینڈ، روس، امریکا، جنوبی کوریا اور برازیل سے متعلق ایسے ڈیٹا کی مدد لی، جو 1945ء سے لے کر اب تک کے حالات کا احاطہ کرتا تھا۔ میونسٹر یونیورسٹی نے اس مطالعاتی جائزے کو مذہبی رجحانات کے حوالے سے اب تک کے جامع ترین جائزوں میں سے ایک قرار دیا ہے۔