میونخ کانفرنس: شامی بحران کا حل، عالمی برادری کی ناکامی

جرمنی کےجنوبی شہر میونخ میں جمعہ اکتیس جنوری سے شروع ہوکر دو فروری تک جاری رہنے والی تین روزہ بین الاقوامی سکیورٹی کانفرنس کا مرکزی موضوع گرچہ شام کا بحران اور اس کے ممکنہ حل کی کوششیں تھا، تاہم عالمی برادری کے نمائندے اس بارے میں کوئی ٹھوس حکمت عملی طے کرنے میں ناکام رہے۔

میونخ کانفرنس میں بار بار شام کا بحران اور وہاں کا انسانی المیہ زیر بحث لایا گیا تاہم اس بارے میں متنازعہ گفتگو نہ ہوئی اور خلاصہ یہ کہ چند کلیدی نوعیت کے سوالات جواب طلب ہی رہے۔ تاہم کانفرنس کے شرکاء نے شام سے متعلق مذاکرات کی ناکامی کا اقرار کیا۔

میونخ کانفرنس میں ہونے والی بات چیت کا ایک روشن پہلو چند ہی دنوں میں شروع ہونے والے ’سوچی سرمائی اولمپک گیمز‘ کا موضوع تھا۔ اس کے بارے میں ایک کمزور سی امید ظاہر کی گئی کہ یہ ایونٹ بغیر کسی تشدد کے منعقد ہو سکے گا۔ اس طرح اولمپک کھیلوں کی قدیم روایت قائم رہے گی۔ یونان کی تاریخ میں اولمپک مقابلوں کے زمانے میں کم از کم ان کھیلوں کے انعقاد کے دوران ہتھیار خاموش ہوجایا کرتے تھے۔

اس کے برعکس شام کے بحران کے سلسلے میں کسی سیاستدان، لیڈر یا وزیر نے کوئی حوصلہ افزا بیان نہیں دیا۔ خاص طور سے گزشتہ ہفتے سوئٹزرلینڈ کے مقام مونترو میں کئی روز جاری رہنے کے بعد کسی ٹھوس نتیجے کے بغیر ختم ہونے والے شام امن مذاکرات کے بعد کسی کی ہمت نہیں ہو رہی کہ وہ شامی تنازعے کے بارے میں کوئی پیشگوئی کر سکے۔ میونخ سکیورٹی کانفرنس میں شامل ترک وزیر خارجہ احمت داؤد اُگلو نے کہا، ’’آئندہ 50 برسوں تک ہم اس حقیقت کو یاد رکھیں گے کہ 2013ء میں شام کے بحران کے حل کے بارے میں منعقد ہونے والے اجلاس میں عالمی برادری شامی باشندوں پر ہونے والے زہریلی گیس کے حملے کو رکوانے میں ناکام رہی تھی‘‘۔ ترک وزیر خارجہ نے یہ بیان طنز کرتے ہوئے دیا، کیونکہ اس سال کی میونخ سکیورٹی کانفرنس اس کی گولڈن جوبلی یعنی 50 ویں سالگرہ کے موقع پر منعقد ہوئی تھی۔

حقائق پر بحث کی بجائے بیان بازی

میونخ سکیورٹی کانفرنس میں سعودی شہزادہ ترکی الفیصل نے، جو فیصل سینٹر فار ریسرچ اینڈ اسلامک اسٹیڈیز کے ڈائریکٹر بھی ہیں، شام کے بحران کے حوالے سے متعدد ممالک پر الزام عائد کیا۔ انہوں نے شامی صدر بشارالاسد کو قتل عام اور انسانیت کے خلاف جرائم کا مرتکب قرار دیتے ہوئے کہا، ’’میں ایران اور حذب اللہ کو اسد کی حمایت کرنے کا قصوروار ٹھہراتا ہوں، میں النصرہ جیسے جہادی گروپوں کو بھی انسانیت کے خلاف جنگی جرائم کا مرتکب سمجھتا ہوں‘‘۔ سعودی شہزادے کی یہ فہرست یہیں ختم نہیں ہوئی۔ انہوں نے اقوام متحدہ سمیت متعدد مغربی ممالک پر بھی شامی بحران کے حوالے سے الزامات عائد کیے۔ تاہم فرانس پر انہوں نے کوئی الزام نہیں لگایا کیونکہ یہ وہ یورپی ملک ہے جس نے شامی صدر اسد کی طرف سے مبینہ طور پر کیمیائی ہتھیاروں کے استعمال کے بعد اوباما کی طرف سے فوجی حملے کی دھمکی کا بھرپور ساتھ دیا تھا۔ شہزادہ ترکی الفیصل کی اس فہرست میں تاہم اُن کا اپنا ملک سعودی عرب اور قریبی حلیف قطر کا نام شامل نہیں تھا۔ اس پر کانفرنس کے شرکاء میں بحث و مباحثہ شروع ہوگیا۔

مغربی ممالک کا مؤقف

شامی اپوزیشن کو ہتھیاروں کی امداد نہ دینے کے بارے میں مغربی ممالک کا جواز یہ رہا ہے کہ انہیں خطرہ ہے کہ یہ ہتھیار نام نہاد جہادیوں کے ہاتھ لگ جائیں گے۔ شام میں فعال کردار ادا کرنے والے جہادی گرپوں کا نام آتے ہی دو ممالک زیر غور ہوتے ہیں، ایک سعودی عرب اور دوسرا قطر۔ تاہم میونخ کانفرنس میں موجود امریکی سینیٹر جان مک کین نے اس موضوع پر سرے سے بات ہی نہ ہونے دی۔ وہ نہیں چاہتے تھے کہ سعودی شہزادہ ترکی الفیصل کی موجودگی میں یہ موضوع زیر بحث آئے۔

کوئی تنازعہ نہیں

تین روزہ میونخ سکیورٹی کانفرنس کے دوران بار بار شام کا موضوع سامنے آتا رہا تاہم تمام شرکاء مشترکہ طور پر یہ قبول کر لیتے کہ شام امن مذاکرات ناکام رہے ہیں لیکن اس کی وجوہات پر کوئی لب کھولنے کو تیار نظر نہیں آیا۔ تاہم اس بحران کے چند مرکزی کرداروں کے نمائندوں نے اپنی اپنی صفائی پیش کردی۔ روسی وزیر خارجہ سرگئی لاوروف کا کہنا تھا کہ اُن کا ملک تنہا اسد حکومت پر اثر انداز نہیں ہو سکتا۔ یہ بیان گرچہ از خود بحث کا موضوع بن سکتا تھا تاہم کسی نے بھی اس بیان کو متنازعہ نہیں کہا اور نہ ہی لاوروف کی کسی نے تردید کی۔ اُدھر ایرانی وزیر خارجہ محمد جواد ظریف نے شام کے ایٹمی مذاکرات سے متعلق ایک پینل مباحثے کے دوران کہا کہ تہران نے شام میں فائربندی کا مطالبہ کیا ہے۔ انہوں نے کہا کہ دمشق میں قائم ایرانی سفارتخانہ پوری کوشش کر رہا ہے متاثرہ انسانوں کوضروری امدادی اشیاء کی فراہمی کی۔ ایرانی وزیر خارجہ نے کہا، ’’اہم ترین سوال یہ ہے کہ دوسری جانب سے جنگ جاری رکھنے والوں اور صورتحال کو اپنے کنٹرول میں رکھنے والوں تک ہم کس طرح پہنچیں اور انہیں فائر بندی پر کس طرح آمادہ کیا جائے؟‘‘ ظریف کے بقول، ’’یہ جنگجو، وہ نہیں جو سوئٹزرلینڈ میں منعقدہ امن مذاکرات کی میز پر بیٹھے تھے۔‘‘