ٹیسلا کی جرمن فیکٹری نے کار پروڈکشن شروع کر دی

جرمن دارالحکومت برلن کے مشرق میں وفاقی صوبے برانڈنبُرگ کے ضلع اوڈر شپری کے قصبے گُرونہائیڈے میں دو برس قبل ٹیسلا فیکٹری تعمیر کرنا شروع کی گئی تھی۔ یہ برلن سے تیس کلومیٹر کی دوری پر واقع ہے۔

ٹیسلا گرونہائیڈے میں الیکٹرک کاروں کی پہلی کھیپ کی پروڈکشن مکمل ہونے پر منعقد کی جانے والی تقریب میں ٹیسلا کار ساز ادارے کے بانی ایلون مسک خاص طور پر شریک ہوئے۔ ٹیسلا کی جرمن فیکٹری سے اولین تیس کاریں گاہکوں کے حوالے کر دی گئیں۔ اس تقریب میں خریداروں کے ساتھ ان کے خاندان کے افراد بھی موجود تھے۔

بھارت: ایلن مسک کے ایک ٹوئٹ پرسیاسی رہنما اتنے بیتاب کیوں؟

اس تقریب میں جرمن چانسلر اولاف شولس اور وزیر اقتصادیات رابرٹ ہابیک بھی شریک تھے۔ ٹیسلا فیکٹری کا نام گیگا فیکٹری رکھا گیا ہے۔ اس کی تعمیر پر پانچ بلین ڈالر سے زائد کی لاگت آئی ہے۔

ٹیسلا کی گیگا فیکٹری

 اسی پلانٹ پر کاروں کے ساتھ ہی ساتھ بیٹری بھی تیار کی جائیں گی۔ پلانٹ پر ہونے والی تقریب میں شریک ایلون مسک نے مسرت کا اظہار کرتے ہوئے کاروں کی پروڈکش کو ایک قابلِ فخر دن قرار دیا۔ انہوں نے اولین تیس کسٹمرز کو ٹیسلا الیکٹرک کاروں کی چابیاں دیں۔

جرمن پلانٹ میں ٹیسلا الیکٹرک کاروں کی فیکٹری کی تعمیر مئی سن 2020 میں شروع کر دی گئی تھی۔ ابتدا میں بیس بنیادی کاروں کی فراہمی کے عارضی پرمٹ جاری کیے گئے تھے۔ جرمن فیکٹری میں ٹیسلا کا ماڈل 'وائی‘ تیار کیا گیا ہے۔ قبل ازیں یہ ماڈل چینی شہر شنگھائی میں قائم ٹیسلا فیکٹری سے جرمنی لایا جاتا تھا۔

ٹیسلا کی الیکٹرک گاڑیوں کی فروخت میں ریکارڈ اضافہ

پروڈکشن میں تاخیر

ٹیسلا فیکٹری کی انتطامیہ کی خواہش تھی کہ جرمن پلانٹ سے پروڈکشن سن 2021 کے موسم گرما میں شروع کر دی جاتی لیکن ایسا ممکن نہیں ہو سکا۔ تاخیر کی سب بڑی وجوہات میں برانڈنبرگ ریاست میں ہیلتھ اور ماحولیاتی حکام نے کمپنی کو گاڑیوں کی آزمائش کی اجازت تو دے دی لیکن فروخت روک دی۔

اب تمام معاملات حل ہو گئے ہیں اور ٹیسلا کمپنی چھ ماہ کے دوران تیس ہزار الیکٹرک کاریں تیار کر کے کسٹمرز کے حوالے کرے گی۔ گیگا فیکٹری جب مکمل طور پر فعل ہو جائے گی تو سالانہ بنیاد پر پانچ لاکھ کاریں تیار کی جا سکیں گی۔

’پاور وال‘ توانائی کا انفراسٹرکچر بدل دے گا، ٹیسلا

یہ امر اہم ہے کہ یورپ میں الیکٹرک کاروں کی پروڈکشن میں مسابقتی عمل پوری طرح دیکھا نہیں جا رہا۔

ع ح / اب ا (ڈی پی اے، اے ایف پی)