پاکستان ساختہ جنگی طیارے آذربائیجان کو فروخت کیے جائیں گے

یہ لڑاکا طیارے چین کے تعاون سے پاکستان میں تیار کیے جاتے ہیں۔ پاکستان ایروناٹیکل کمپلیکس میں تیار کیے جانے والے JF-17 Block III جیٹ لڑاکا طیارے جدید ٹیکنالوجی سے لیس ہیں۔

یاد رہے کہ گزشتہ کچھ برسوں سے پاکستان کے اپنے روایتی اتحادی ملک امریکا سے تعلقات میں سرد مہری دیکھی جا رہی ہے، اس لیے اسلام آباد حکومت نے چین کے ساتھ اپنا عسکری تعاون بھی بڑھا دیا ہے۔

پاکستانی فوج نے ان طیاروں کی ڈیل کے بارے میں زیادہ معلومات فراہم نہیں کی ہیں۔ اس ڈیل کی مالیت یا آذربائیجان کو فروخت کیے جانے والے طیاروں کی تعداد بھی نہیں بتائی گئی ہے۔

پاکستانی فوج نے اپنے ایک بیان میں کہا گیا ہے کہ یہ ڈیل دراصل دوست ممالک کے ساتھ دفاعی تعاون بڑھانے اور آذربائیجان کی فضائی طاقت کی صلاحیتوں کو زیادہ فعال بنانے کی اسلام آباد کی کوششوں کا حصہ ہے۔

آذربائیجان ترکی کا بھی اتحادی ملک ہے

پاکستان ترکی کا قریبی اتحادی بھی ہے، جس نے گزشتہ سال جنوبی قفقاز کے دو ممالک آرمینیا اور آذربائیجان کے مابین ہونے والی جھڑپوں میں ترکی کے حامی ملک آذربائیجان کی ہی حمایت کی تھی۔ ان جھڑپوں کے نتیجے میں آرمینیا اور آذربائیجان کے مابین دہائیوں پرانی دشمنی ایک بار پھر شدید ہو گئی تھی۔

آذربائیجان کے صدر الہام علیئیف  جولائی میں سرکاری دورے پر پاکستان آئے تھے، جہاں دونوں ممالک نے دفاع سمیت متعدد شعبوں میں تعاون بڑھانے پر اتفاق کیا تھا۔

پاکستانی فوج کے ایک بیان کے مطابق آذر صدر کے اس دورے کے بعد پاکستانی فوج نے باکو منعقدہ ایک عسکری نمائش میں شرکت کے لیے اپنی فضائیہ کا ایک دستہ روانہ کیا تھا۔

اس پاکستانی وفد نے آذربائیجان کی دفاعی اجمتاع میں شرکت کرتے ہوئے پاکستان میں بننے والے ان جنگی طیاروں اور دیگر عسکری سازوسامان کو اس نمائش میں پیش کیا تھا۔

پاکستانی فوج کے اس بیان میں مزید کہا گیا ہے کہ یہ طیارہ  جدید فضائی طاقت کے وسیع تر آپشنز فراہم کرنے کے ساتھ ساتھ  بڑے پیمانے پر جنگی مشن انجام دینے کی صلاحیت بھی رکھتا ہے۔

 روئٹرز، اے ایف پی (ع ب/ ع ت)