’پاکستانی ٹرانس جینڈر حج پر جا سکیں گے‘

خبر رساں ادارے تھامسن روئٹرز فاؤنڈیشن نے پاکستان بوائے اسکاؤٹس ایسوسی ایشن کے سربراہ عاطف امین حسینی کے حوالے سے بتایا ہے کہ پروگرام ہے کہ اس مرتبہ تقریبا چالیس ٹرانس جینڈر افراد کو معاشرے کے مرکزی دھارے میں شامل کرنا ضروری ہے۔ انہوں نے گزشتہ ہفتے ہی تقریبا چالیس ٹرانس جینڈر افراد کو بطور اسکاؤٹس اپنی ایسوسی ایشن کا رکن بنایا تھا۔

’خواجہ سراؤں کو بھی ووٹ کا حق دیا جائے‘

مردم شماری کا آغاز، سروے فارم میں ’ٹرانس جینڈر کا کالم غائب‘

پاکستان میں مردم شماری، ٹرانس جینڈر بھی شمار کیے جائیں گے

کراچی سے ٹیلی فون پر گفتگو کرتے ہوئے حسینی نے تھامسن روئٹرز فاؤنڈیشن کو بتایا، ’’ہم سب کے لیے برابری کے حقوق پر یقین رکھتے ہیں۔ ہمیں خوشی ہے کہ ہم نے ٹرانس جینڈر افراد کو اپنی ایسوسی ایشن میں شامل کیا ہے۔‘‘

پاکستان میں عمومی طور پر ٹرانس جینڈر افراد کو اپنے ہی گھرانوں کی طرف سے نظر انداز کر دیا جاتا ہے۔ ایسے افراد کو بھیک مانگنے یا جسم فروشی پر مجبور کیا جانا بھی عام سی بات تصور کی جاتی ہے۔ تاہم حالیہ عرصے کے دوران پاکستان میں اس حوالے سے شعور و آگاہی میں بہتری پیدا ہوئی ہے۔

اب ٹرانس جینڈر افراد کو مسلمانوں کے مقدس ترین مقام پر روانہ کرنا، ایک اہم قدم قرار دیا جا رہا ہے۔  عاطف امین حسینی کے مطابق چالیس تا پچاس ٹرانس جینڈر افراد کے ایک گروپ کو بطور رضاکار سعودی عرب روانہ کرنے کا پروگرام بنایا گیا ہے، ’’ہمیں خوشی ہے کہ ہم انہیں حج پر روانہ کریں گے۔‘‘ انہوں نے مزید کہا کہ اس اہم موقع کے لیے تمام اسکاؤٹس کو میرٹ پر منتخب کیا جائے گا۔

پاکستان میں ٹرانس جینڈر افراد کی اصل تعداد کے بارے میں مصدقہ سرکاری اعدادوشمار موجود نہیں ہیں تاہم امدادی ادارے ٹرانس ایکشن پاکستان کے اندازوں کے مطابق تقریبا ایک سو نوے ملین آبادی والے اس ملک میں کم ازکم نصف ملین افراد ٹرانس جینڈر ہیں۔

پشاور کے ایک مقامی ادارے بلیو وینز کے پروگرام کوآرڈینیٹر قاسم نسیم کے مطابق ٹرانس جینڈر افراد کو اسکاؤٹس کے طور پر بھرتی کرنا ایک اچھا اقدام ہے کیونکہ اس طرح معاشرے میں اس اقلیت کی قبولیت میں مدد ملے گی۔

قاسم نسیم نے تھامسن روئٹرز فاؤنڈیشن سے گفتگو میں کہا، ’’پاکستان پہلے ہی ان (ٹرانس جینڈر افراد) کی شناخت کو تسلیم کرتا ہے۔ اس لیے اس کمیونٹی کو معاشرے میں ضم کرنے کی خاطر مزید اقدامات اٹھانے کی ضرورت ہے۔‘‘

پاکستان میں تیسری صنف سے تعلق رکھنے والے افراد کو پہلی مرتبہ مردم شماری میں شمار کیا گیا تھا جبکہ سن دو ہزار سترہ میں تھرڈ سیکس کی علامت X کے نشان کے ساتھ ان افراد کو پاسپورٹ جاری کرنے کا عمل شروع کر دیا گیا تھا۔