Bangladesh: An rantsar da Hasina a wa'adi na 4

Hasina dai ita ce Firanminista ta farko a tarihin Bangladesh da aka zaba sau hudu a jere. Shugabar mai shekaru 76 da haihuwa ta sha rantsuwar kama aiki ne a ofishin shugaban kasa, Mohammed Shahabuddin tare da majalisar ministocinta.

Tun da fari dai, babbar jam'iyar adawa ta kasar BNP ta tsohuwar Firanminista Khaleda Zia ta kaurace wa zaben saboda fargabar rashin gudanar da sahihin zabe.

Karin bayani: Bangladesh: Sheikh Hasina ta lashe zabe

Dama jam'iyar ta dade ta na neman a gudanar da zabe karkashin gwamnatin rikon kwarya, sai dai kuma jam'iyyar Hasina ta Awami League Party ta yi watsi da bukatar, inda ta ce hakan ya saba wa kudin tsarin mulkin kasar.