Sabbin hare-hare a Najeriya

Rahotannin da ke fitowa daga arewa maso gabashin Najeriya, na cewa wasu mutane bakwai sun mutu a wasu hare-haren kunar bakin wake da ake alakantasu da mayakan Boko Haram. Masu aikin ceto da ma jami'an tsaro sun ce harin farko ya auku ne a kauyen Mammanti mai tazarar kilomita 15 a gashin birnin Maiduguri.

A cewarsu wasu 'yan banga sun yi kokarin dakatar da wasu 'yan mata uku dake dauke da bama-bamai da asubahin yau, inda biyu daga cikinsu suka tarwatsa kansu, dayar kuwa soja ya harbe ta. An kuma sami wani dan banga daya da ya rasa ransa a harin.

Akwai ma wani dan kunar bakin waken namiji da ya shiga kauyen Mainari da ke yammacin birnin Maiduguri, ya kuma kashe 'yan banga uku tare da raunata wasu biyu.