Ердоган и Германија- расправање со отворени карти

„Споредувањата со нацистичките практики се апсурдни и депласирани“, изјави Штефан Зајберт, портпарол на германската влада. Тоа води само кон „ минимизирање на злосторствата против човештвото сторени за време на националсоцијализмот“. Ова појаснување беше една од најдолги изјави на Зајберт за време на неговата повеќегодишна работа на функцијата порттпарол на германската влада. Самото тоа укажува со колкава загриженост Берлин гледа како турските политичари поттикнуваат и создаваат негативно расположение во и против Германија.

Зајберт се изјасни и во поглед на можните настапи на турски политичари во Германија. Тој предупреди оти турската страна треба да настапува со отворени карти, така што, на пример, нема да изнајмува сали за митинзи под лажен изговор. Тоа звучи помалку агресивно и влева страв, истакна Зајберт. 

Предупредување за германските политичари

Притоа предупредувањето на Зајберт е упатено во иста мерка и на германска адреса. Бидејќи опомената да се игра отворено истовремено значи дека турските политичари, ако се придржуваат кон вообичаените правила и норми на однесување, смеат да држат јавни говори во Германија. Тоа е и јасно „Не!“ за оние германски политичари, кои бараат генерална забрана за настап на турските политичари во Германија и со тоа предизвикуваат големо внимание во јавноста.

Таквите парламентарци седат и во таборот на канцеларката: додека Зајберт сѐ уште се наоѓаше во салата за прес-конференции, портпаролот за надворешна политика во пратеничката група на демохристијанските партии ЦДУ/ЦСУ и партиски колега на Меркел, Јирген Харт, настапите на Ердоган и турските членови на владата во Германија ги оцени како непожелни. Не, рече меѓутоа портпаролот на германската влада Зајберт, германската влада не работи на воведување забрани за влез и не сака да ги укине можните настапи на Ердоган пред референдумот во Турција.

Без кршење на германскиот поредок

Звучеше доста саркастично кога и портпаролот на Министерството за надворешни работи со мало одобрување ја резимираше посетата на турскиот министер за економија во Германија. „Таа помина „без кршење на начелата на германскиот слободен, демократски поредок“.“ Сојузната влада се наоѓа на лизгав терен. Важно е да се покаже јасен став и исто така да се игра отворено. Дипломатијата и тешките зборови меѓу политичките партнери во мирни времиња се непријатни, но во немирни времиња се многу важни. А светот, вклучувајќи ја и Европа, сега е немирен.

Одамна се работи за начелното прашање, кое гласи всушност каде ја води еден ваков пат Турција и како Германија притоа треба да се однесува. Тешко се поднесува фактот дека Европејците, а посебно канцеларката Меркел мораа да постигнат договор токму со Турција за запирање на приливот на бегалци. Приказната за наводните прекрасни германско-турски односи одамна е завршена. На примерот на уапсениот новинар Дениз Јуџел и неговата судбина се распламтуваат нови дебати за смислата на „двојниот пасош“.

Германски интерес за стабилна Турција

Ситуацијата е сериозна. Без разлика на исходот од референдумот за уставна реформа, која ќе се одржи во средината на април во Турција, германската страна не смее да се воздржи од јасни зборови и ставови. Таа би требала да покаже каква вредност имаат демократијата и слободата на говорот и на јавните собири и тоа секаде, не само во Германија.

Но Берлин ќе мора да има предвид и каква помош од европска страна ѝ е потребна на Турција, потресена од воен удар и антивоен удар, со или без претседателот Ердоган, со цел да се стабилизира земјата. Поради тоа е добро што Берлин не звучеше премногу остро.