ایراني رسنۍ: په سیستان او بلوچستان کې څلور وسله وال وژل شوي

د جیش العدل ډلې جنګیالیو چې مقر ېې په پاکستان کې دی، د اکتوبر په ۲۶مه د سیستان او بلوچستان ایالت په تفتان سیمه کې پر یوه امنيتي پوسته حمله کې لس پولیس ووژل. دا په وروستیو میاشتو کې په ایران کې یوه تر ټولو خونړۍ حمله وه.

د ایران رسمي خبري آژانس ایرنا د ایران د سپاه انقلاب د یوه قوماندان احمد شفائي، له قوله لیکلي دي: «په مجموع کې اته تروریستان وژل شوي دي.»

د ایران دغه پوځي چارواکي ويلي دي چې «۱۴ نور تروریستان نيول شوي» چې د تفتان په حمله کې ښکيلې کليدي څېرې دي. هغه زياته کړې چې امنتيي ځواکونو دغه راز په ډېر مقدار وسلې او مهمات هم ترلاسه کړي دي.

د ایران د سپاه پاسداران د ځمکنیو ځواکونو قوماندان محمد پاکپور، د دوشنبې په ورځ ناوخته ایرنا، ته وویل چې هغه جنګیالي چې د اکتوبر په ۲۶مه یې حمله کړې وه، «ایرانیان نه ول»، خو پاکپور د هغو د ملیت په هکله معلومات ور نه کړل.

د ایران سیستان او بلوچستان ولایت چې له افغانستان او پاکستان سره ګډه پوله لري، د ایران د تر ټولو بې وزلو سیمو په ډله کې شمېرل کیږي.

دغه سیمه له اوږدې مودې راهیسې له پولې ورهاخوا د سني افراطیانو او بېلتون غوښتونکو د حملو شاهده پاته شوې او دغه راز پکې د امنيتي ځواکونو او وسله والو ډلو ترمنځ هم په کراتو نښتې رامنځ ته کیږي.

په دغه ولایت کې د اکتوبر میاشتې په سر کې هم په دوو جلا حملو کې د پولیسو په ګډون لږ تر لږه شپږ تنه وژل شوي ول. د دغو حملو مسئولیت هم د جیش العدل ډلې منلی وو.

دغه بلوچ بيلتون غوښتونکې ډله چې په ۲۰۱۲ کال کې جوړه شوې، ایران او امریکا متحده ایالات ېې د یو «تروریستي سازمان» په توګه پېژني.

Mks/sr/Af/si (AFP)