اب فرانسیسی قانون سازوں کی تائیوان آمد

پانچ فرانسیسی قانون سازوں کا ایک وفد بدھ کے روز تائی پے پہنچا ہے۔ امریکی ایوان کانگریس کی اسپیکر نینسی پیلوسی کے گزشتہ ماہ تائیوان کے دورے کے بعد کسی اعلیٰ سطحی یورپی وفد کا یہ تائیوان کا پہلا دورہ ہے۔

تائیوان کا دورہ، چین نے امریکی پارلیمانی اسپیکر پر پابندیاں لگا دیں

پیلوسی کی تائیوان کے صدر سے ملاقات، چین نے امریکی سفیر کو طلب کر لیا

فرانسیسی وفد تائیوان میں کیا کر رہا ہے؟

فرانس کی مختلف پارٹیوں پر مشتمل اس وفد کی قیادت سینیٹر سائرل پیلیوٹ کر رہے ہیں وہ فرانس کے ایوان بالا میں یورپی امور کمیٹی کے نائب صدر ہیں۔

فرانسیسی قانون سازوں کا یہ وفد تائیوان کے نائب صدر لائی چنگ ٹی، ایوان کے اسپیکر یو سی کن کے علاوہ دیگر اعلیٰ عہدیداروں کے ساتھ ملاقات کرے گا۔ ملاقات کے دوران علاقائی سلامتی، تکنیکی جدت طرازی اور صنعتی سپلائی چین کو تقویت فراہم کرنے سمیت متعدد دیگر امور پر تبادلہ خیال کیا جائے گا۔

گزشتہ ایک سال کے دوران فرانسیسی قانون سازوں کا تائیوان کا یہ چوتھا دورہ ہے۔

تائیوان کے وزارت خارجہ کے ترجمان جوآن او نے کہا،" ان رہنماوں کی آمد تائیوان اور فرانس کے درمیان اچھی دوستی کو مکمل طور پر ظاہر کرتی ہے۔"

فرانسیسی قانون سازوں کا یہ وفد پیر تک تائیوان میں رہے گا۔

تائیوان کے اعلیٰ سطحی امریکی دورے

فلوریڈا کی ڈیموکریٹ رکن اسٹیفنی مرفی کی قیادت میں ایک اور امریکی وفد بدھ کے روز ہی تائیوان پہنچنے والا ہے، جو جمعہ تک قیام کرے گا۔

دونوں جماعتوں پر مشتمل اس وفد میں ڈیموکریٹ کائلی کاہیلے اور ری پبلکن رہنما اسکاٹ فرینکلن، جوئے ولسن، اینڈی بر، ڈیریل عیسیٰ، کلاوڈیا ٹینی اور کیٹ کیمک شامل ہیں۔

یہ دورہ اعلیٰ سطحی امریکی عہدیداروں کے دورے کی تازہ ترین کڑی ہے، جو قانون سازوں، ریاستوں کے گورنروں اور پیلوسی کے دورے کے بعد ہو رہے ہیں۔

پیلوسی تائیوان کا دورہ کرنے والی اعلیٰ ترین امریکی اہلکار تھیں اور ان کے اس دورے نے امریکہ اور چین کے درمیان کشیدگی میں مزید اضافہ کر دیا تھا۔ اس دورے کے فوراً بعد ہی بیجنگ نے کہا تھا کہ وہ "پیلوسی اور اس کے قریبی خاندان پر پابندیاں عائد کرے گا۔"

خطے میں بڑھتی کشیدگی

چین تائیوان پر اپنا علاقہ ہونے کا دعویٰ کرتا ہے۔ پیلوسی کے بعد اس نے بڑے پیمانے پر فوجی مشقیں شروع کر دیں۔ اس نے متنبہ کیا تھا کہ اگر امریکہ کی طرف سے اشتعال انگیزی کی گئی تو فوجی کارروائی سے اس کا جواب دیا جائے گا۔

گرچہ واشنگٹن کے تائیوان کے ساتھ باضابطہ تعلقات نہیں ہیں اور وہ "ایک چین پالیسی" کو تسلیم کرتا ہے تاہم اس کا کہنا ہے کہ وہ قانون کے مطابق تائیوان کی دفاع کے لیے ذرائع فراہم کرنے کا پابند ہے۔

امریکہ تائیوان کو بڑے پیمانے پر مسلح کرنا چاہتا ہے، رپورٹ

’ہم امریکی جنگی بحری جہازوں پر نظر رکھے ہوئے ہیں،‘ چینی فوج

تائیوان کے صدر سائی انگ ون نے منگل کے روز کہا کہ چین کے فوجی طیاروں کی دراندازی جاری رہنے سے صورت حال بدستور کشیدہ ہے۔ تائی پے نے چین کی جانب سے غلط معلومات پھیلانے کی مہم اور ڈرونز کے خلاف بھی خبر دار کیا ہے۔

تائیوان، جس کی 1949سے جمہوری طورپر منتخب حکومت ہے، کا کہنا ہے کہ چین نے اس جزیرے پر کبھی حکومت نہیں کی او رنہ ہی اس پر دعویٰ کرنے کا اسے کوئی حق ہے۔ تائی پے کے مطابق تائیوان کے مستقبل کا فیصلہ اس کے 23 ملین لوگ ہی کر سکتے ہیں۔

ج ا/ ص ز (روئٹرز، ڈی پی اے)