مزار شریف میں باغیوں کے گرد اسپیشل فورسز کا گھیرا تنگ

جرمن خبر رساں ادارے ڈی پی اے کے مطابق گھیرے میں آئے ہوئے حملہ آور مزاحمت جاری رکھے ہوئے ہیں جبکہ فائرنگ کے تبادلے میں اب تک ایک سکیورٹی گارڈ اور دو حملہ آور ہلاک ہو چکے ہیں۔ صوبہ بلخ کے گورنر کے ترجمان منیر فرہاد کے مطابق حملہ آور قونصل خانے میں داخل ہونے میں کامیاب نہیں ہو سکے اور قونصل خانے کا تمام اسٹاف محفوظ ہیں۔ افغان فورسز نے عمارت کو گھیرے میں لیا ہوا ہے۔

مسلح حملہ آوروں کے ایک چھوٹے گروپ نے اتوار کے روز شام دیر گئے بھارتی قونصل خانے کی عمارت میں داخل ہونے کی ناکام کوشش کی تھی۔ دہشت گردوں نے یہ کارروائی ایک ایسے وقت سے فائدہ اُٹھاتے ہوئے کی تھی جب بہت سے لوگ افغانستان اور بھارت کے مابین ہونے والا فُٹ بال میچ دیکھنے میں مصروف تھے۔ افغانستان میں یہ واقعہ ایک ایسے میں وقت پیش آیا جب پاک بھارت سرحد کے نزدیک ایک بھارتی فضائی اڈے ’’پٹھان کوٹ ائیر بیس‘‘ پر مسلح افراد کے ساتھ سکیورٹی فورسز جھڑپ جاری رکھے ہوئے تھے۔ پٹھان کوٹ کا ہوائی مرکز شمالی بھارت کا سب سے بڑا ایئر بیس ہے۔

اطلاعات کے مطابق مزارشریف میں قائم بھارتی قونصل خانے میں گھُسنے کی کوشش ناکام ہونے کےبعد حملہ آوروں نے ایک قریبی مکان میں داخل ہو کر خود کو وہاں بند کر لیا تھا جہاں پیر کی صبُح افغان سکیورٹی فورسز نے حملہ آوروں کے خلاف ایک بڑا آپریشن کیا تاہم فورسز سست روی سے اپنی کارروائی جاری رکھے ہوئے ہیں تاکہ کم سے کم شہریوں کو نقصان پہنچے۔ ان کا یہ آپریشن شدید بارش کے سبب بھی مشکلات کا شکار ہے۔

دریں اثناء صوبائی حکومت کے ایک ترجمان عطا محمد نور نے اپنے فیس بُک پیج پر پیغام تحریر کیا ہے کہ،’’ تمام تر علاقے کو سیل کر دیا گیا ہے اور ہم نہایت احتیاط سے اپنی کارروائی کو آگے بڑھا رہے ہیں تاکہ شہریوں کی جانوں کو تحفظ فراہم کیا جاسکے لیکن حملہ آوروں کو ہلاک کیا جائے گا‘‘۔

مقامی ذرائع کے مطابق اُزبکستان سے ملحقہ افغان صوبے بلخ کے اس شہر میں شہریوں کو افغان فوج اور پولیس کمانڈوز نے بھاری مشین گنوں اور راکٹ سے چلنے ولے گرینیڈ اور توپوں سے گولے داغے جانے کی آوازیں سنائی دیں۔ بتایا گیا ہے کہ شہر کے ایک رہائشی علاقے پر مسلسل ہیلی کاپٹرز فضائی نگرانی کا سلسلہ جاری رکھے ہوئے ہیں۔

ایک دستی بم سے ایک شہری کے زخمی ہونے کی اطلاع ہے جبکہ پانچ سکیورٹی اہلکاروں کو معمولی زخم آئے ہیں تاہم بھارتی سفیر نے کہا ہے کہ بھارتی قونصل خانے کے تمام اہلکار محفوظ ہیں۔

صوبائی حکومت کے ترجمان عطا محمد نور نے ان حملوں کا ذمے دار افراد کو ’’ امن اور استحکام دشمن عناصر کو ٹھہرایا ہے‘‘۔ انہوں نے کہا کہ یہ دہشت گردانہ حملے ایک سوچی سمجھی حکمت عملی نظر آتی ہے جو ایسے وقت میں بروئے کار لائی گئی ہے جب پاکستان اور اُس کے روایتی حریف بھارت کے مابین تعلقات میں بہتری کی از سر نو کوششیں شروع کی گئی ہیں اور دوسری جانب افغانستان میں طالبان کے ساتھ امن مذاکرات کو دوبارہ شروع کرنے کا بھی فیصلہ کیا گیا ہے۔

اب تک ان حملوں کے پیچھے کارفرما عناصر کے بارے میں کوئی واضح نشاندہی نہیں کی گئی ہے۔