’مسلمانوں کی امیگریشن یورپ کو تباہ کر دے گی‘

خبر رساں ادارے اے ایف پی نے ہنگری کے وزیر اعظم وکٹور اوربان کے حوالے سے بتایا ہے کہ اگر وہ الیکشن میں کامیاب ہوئے تو ان کی نئی حکومت مہاجرین کے لیے کام کرنے والے غیر سرکاری اداروں پر ٹیکس بڑھا دیں گی۔

اتوار کی رات ’اسٹیٹ آف دی نیشن‘ خطاب میں انہوں نے خبردار کیا کہ مسلمانوں کی امیگریشن یورپ کو تباہ کر دے گی۔ ہنگری میں قومی الیکشن آٹھ اپریل کو منعقد کیے جا رہے ہیں۔

ہنگری میں مہاجرین مخالف قانون پر ایمنسٹی انٹرنیشنل کی تنقید

وسطی یورپ اِس براعظم کی نئی ابھرتی قوت ہے، وکٹور اوربان

ہنگری اور پولینڈ مہاجرین مخالف پالیسیاں جاری رکھیں گے

قدامت پسند فیڈس پارٹی کے سربراہ وکٹور اوربان تیسری مرتبہ  وزارت عظمیٰ کے منصب کے لیے تیاریوں میں ہیں۔ الیکشن سے قبل انہوں نے اپنے اسلام اور مہاجرت مخالف بیانیے میں مزید سختی پیدا کر دی ہے۔

اسی تناظر میں ان کی سیاسی پارٹی نے ایک ایسا قانون بھی تجویز کر دیا ہے، جس کے تحت ہنگری میں آنے والے مہاجرین کی فلاح وبہبود کا کام کرنے والی این جی اوز پر بھاری جرمانے عائد کیے جا سکیں گے۔

وکٹور اوربان نے اپنے عوامی خطاب میں ایسی غیر سرکاری تنظیموں کے بارے میں سخت موقف اختیار کرتے ہوئے مزید کہا کہ اگر ان این جی اوز نے اپنی ’خطرناک کارروائیاں‘ نہ روکیں تو انہیں ملک سے ہی نکال دیا جائے گا۔

انہوں نے مزید کہا کہ بے شک یہ غیر سرکاری ادارے بہت زیادہ مالدار ہی کیوں نہ ہوں لیکن انہیں ہنگری میں مہاجرین کے لیے کام نہیں کرنے دیا جائے گا۔

اس مجوزہ قانون کے تحت پناہ کے متلاشی افراد کی خاطر کام کرنے والے غیر ملکی امدادی اداروں پر پچیس فیصد ٹیکس لاگو کیا جائے گا جبکہ انہیں ملکی سرحدوں پر قائم کردہ عارضی رہائشی کیمپوں میں داخلے کی اجازت بھی نہیں ہو گی۔

ہنگری میں کیے جانے والے ایسے اقدامات پر یورپی یونین کی سطح پر تشوش کا اظہار کیا جا رہا ہے۔

وکٹور اوربان کی سیاسی جماعت فیدس پارٹی کے پاس اگرچہ فی الحال پارلیمان میں دو تہائی اکثریت نہیں ہے کہ وہ اس متنازعہ قانون کو پاس کرا سکے۔

لیکن سیاسی ناقدین کا کہنا ہے کہ مہاجرین مخالف اس پالیسی کے نتیجے میں وہ آئندہ الیکشن میں کامیابی حاصل کرتے ہوئے پارلیمان میں کسی بھی قانون سازی کے لیے قطعی اکثریت حاصل کر سکتے ہیں۔

اسٹیٹ آف دی نیشن خطاب میں وکٹور نے دہرایا کہ مسلمانوں کی یورپ آمد سے ’مغربی تہذیب و ثقافت تباہ‘ ہو جائے گی۔ انہوں نے خبردار کیا، ’’اسی مہاجرت کی وجہ سے یورپ پر خطرات کے سیاہ بادل منڈلا رہے ہیں۔‘‘

وکٹور اوربان کے مطابق یورپی باشندوں کو احساس ہی نہیں ہے کہ ’حملہ‘ ہو چکا ہے اور ’یورپ کو فتح کر لیا جائے گا‘۔ انہوں نے مذہبی نعرہ لگاتے ہوئے مزید کہا، ’’مسیحیت ہی یورپ کی آخری امید ہے۔‘‘