آسیہ بی بی کی سزائے موت پر عمل درآمد تاحکم ثانی معطل

ننکانہ صاحب کے ایک گاؤں سے تعلق رکھنے والی آسیہ بی بی کو توہین مذہب کے الزام میں ایک سیشن کورٹ نے 2010ء میں سزائے موت سنائی تھی اور اس سزا کے خلاف دائر کردہ اپیل کو 2014ء میں لاہور ہائی کورٹ کے ایک ڈویژن بنچ نے مسترد کر دیا تھا۔ آسیہ بی بی ملتان میں خواتین کی ایک جیل میں زیر حراست ہے۔

آج بدھ بائیس جولائی کے روز جسٹس ثاقب نثار، جسٹس عمر عطا بندیال اور جسٹس اعجاز احمد چوہدری نے آسیہ بی بی کی طرف سے دائر کردہ اپیل کی سماعت کی۔ ڈی ڈبلیو سے گفتگو کرتے ہوئے آسیہ بی بی کے وکیل سیف الملوک نے کہا کہ انہوں نے اپنے دلائل میں عدالت عظمٰی کو بتایا کہ آسیہ بی بی کیس کے پچھلے فیصلوں میں قانونی تقاضے پورے نہیں کیے گئے تھے۔

انہوں نے عدالت کو بتایا کہ اسلامی قوانین کے تحت گواہوں کے عادل ہونے اور ان کی ساکھ کے بارے آزادانہ تحقیق ضروری ہے تاہم سیف الملوک کے بقول اس کیس میں اس بات کا اہتمام نہیں کیا گیا تھا۔

وکیل صفائی سیف الملوک کا کہنا تھا کہ عدالت اگر محسوس کرے کہ کسی مقدمے کے تمام پہلوؤں کا احسن طریقے سے جائزہ نہیں لیا گیا، تو وہ ازسرنو اس مقدمے کا جائزہ لے سکتی ہے۔ ان کا یہ بھی کہنا تھا کہ مقدمے کے اندراج میں تاخیر کے معاملے کو بھی تفصیل سے دیکھنے کی ضرورت ہے۔

سپریم کورٹ میں تاخیر سے اپیل دائر کیے جانے کے حوالے سے ان کا کہنا تھا کہ سپریم کورٹ اس سلسلے میں درخواست گزار کی صورتحال کا جائزہ لے کر رعایت دینے کا اختیار رکھتی ہے۔ ان کے مطابق موجودہ ملکی وزیر اعظم نواز شریف کے ایک مقدمے میں ان کی اپیل ساڑھے آٹھ سال بعد بھی سنی گئی تھی۔

دوسری طرف اس مقدمے کے مدعی، قاری سالم کے وکیل غلام مصطفٰی نے ڈی ڈبلیو کو بتایا کہ ابھی تو اس مقدمے کی سرسری سماعت ہی ہوئی ہے اور عدالت نے معمول کی عدالتی کارروائی کے مطابق اس مقدمے میں فیصلہ آنے تک آسیہ بی بی کی سزائے موت پر عمل درآمد روکا ہے۔

ان کے بقول ابھی آسیہ بی بی کے تاخیر سے اپیل دائر کیے جانے کے خلاف عدالت نے فیصلہ کرنا ہے۔ گواہوں کے عادل ہونے کے حوالے سے ان کا کہنا تھا کہ آسیہ بی بی کا مقدمہ ملکی قوانین کے تحت سنا جا رہا ہے اور اس نکتے کو سیشن کورٹ اور ہائی کورٹ کے سامنے بھی پیش کیا گیا تھا۔

اس مقدمے میں فریقین کی طرف سے پیروی کرنے والے دونوں وکلاء نے اپنی اپنی کامیابی کی امید ظاہر کی ہے۔ اس مقدمے کی اگلی سماعت کی کوئی تاریخ مقرر نہیں کی گئی۔ ان دنوں چونکہ عدالتوں میں بھی موسم گرما کی تعطیلات ہیں، اس لیے توقع کی جا رہی ہے کہ اس کیس کی اگلی سماعت اکتوبر کے مہینے میں یا اس کے بعد ہی ہو سکے گی۔