امریکا میں کورونا انفیکشنز ایک کروڑ

دنیا بھر میں کورونا متاثرین کی کُل تعداد:     50,407,410       

بھارت میں کورونا سے متاثر ہونے والوں کی تعداد:    8,553,657

جرمنی میں کورونا انفیکشنز کی مجموعی تعداد:    682,624

پاکستان میں کورونا متاثرین کی تعداد:      344,839

عالمی سطح پر کورونا وائرس سے متاثر ہونے والوں کی مجموعی تعداد پانچ کروڑ سے تجاوز کر چکی ہے۔ امریکا کی جانز ہاپکنز یونیورسٹی کے مطابق یہ تعداد پانچ کروڑ چار لاکھ سات ہزار سے بڑھ چکی ہے۔ جبکہ یہ وائرس عالمی سطح پر اب تک 12 لاکھ 57 ہزار کے قریب انسانی جانیں لے چکا ہے۔ دوسری طرف کووڈ انیس سے صحتیاب ہونے والوں کی عالمی تعداد 33,051,085 ہو چکی ہے۔

امریکا بدستور کورونا سے سب سے زیادہ متاثرہ ملک

امریکا دنیا بھر میں پہلا ایسا ملک بن گیا ہے جہاں کورونا کی وباء کے آغاز سے اب تک اس وائرس سے متاثر ہونے والوں کی مجموعی تعداد ایک کروڑ یعنی 10 ملین تک پہنچ گئی ہے۔ امریکا کی جان ہاپکنز یونیورسٹی کے اعداد وشمار کے مطابق یہ تعداد 99 لاکھ 72 ہزار سے زیادہ ہو چکی ہے جبکہ امریکی خبر رساں ادارے روئٹرز کی جانب سےمرتب کردہ اعداد وشمار کے مطابق ملک میں کورونا انفیکشن کا شکار ہونے والوں کی تعداد ایک کروڑ 14 ہزار سے بڑھ چکی ہے۔

امریکا میں گزشتہ 10 دنوں کے دوران قریب 10 لاکھ نئے کیسز سامنے آئے ہیں۔ اس وائرس سے ہونے والی بیماری کووڈ انیس کے سبب امریکا میں ہلاکتیں بھی دنیا بھر میں سب سے زیادہ ہوئی ہیں اور یہ تعداد اب 237,574 تک پہنچ چکی ہے۔

صورتحال بد سے بدتر، ايک دن ميں کورونا کے قريب چھ لاکھ نئے کيسز

کورونا کے شدید بیمار فرانسیسی مریض جرمن ہسپتالوں میں منتقل

بھارت کورونا سے دوسرا سب سے زیادہ متاثرہ ملک

امریکا کے بعد بھارت دنیا میں کورونا سے دوسرا سب سے زیادہ متاثرہ ملک ہے جہاں گزشتہ 24 گھنٹوں کے دوران  45,903 نئے کیسز سامنے آئے جس کے بعد وہاں اس وائرس سے متاثرین کی کل تعداد 8,553,657 تک پہنچ گئی ہے۔ بھارتی وزارت صحت نے آج پیر نو نومبر کو بتایا کہ ملک میں گزشتہ 24 گھنٹوں کے دوران 490 افراد اس بیماری کے سبب موت کا شکار ہوئے۔  کووڈ انیس اب تک بھارت میں مجموعی طور پر 126,611 جانیں لے چکا ہے۔

جرمنی، عمر رسیدہ آبادی کے سبب زیادہ خطرات کا شکار

جرمنی وزیر صحت ژینس اسپاہن نے جرمنی میں کورونا وائرس کی دوسری لہر کے تناظر میں ملک کی عمر رسیدہ افراد کے حوالے سے تحفظات کا اظہار کیا ہے۔ جاپان کے بعد دنیا میں جرمنی عمر رسیدہ آبادی کے حوالے سے دوسرا سب سے بڑا ملک ہے۔ جرمنی یورپ بھر میں کورونا سے چھٹا سب سے زیادہ متاثرہ ملک ہے جہاں کورونا کی وباء کے آغاز سے اب تک اس وائرس سے متاثر ہونے والوں کی مجموعی تعداد 682,624 ہو چکی ہے جبکہ کووڈ انیس کے سبب یہاں ہلاکتوں کی تعداد 11,372 ہو چکی ہے۔

پاکستان میں سیاسی سرگرمیاں اور کورونا کے پھیلاؤ کے خدشات

پاکستان میں کورونا کیسز کی تعداد ایک مرتبہ پھر بڑھ رہی ہے۔ ملکی وزارت صحت کے مطابق گزشتہ 24 گھنٹوں کے دوران 1,650 نئے کیسز سامنے آئے جس کے بعد ملک بھر میں کورونا متاثرین کی کُل تعداد 344,839 ہو چکی ہے جبکہ وہاں اس مہلک وائرس اب تک 6,977 افراد موت کا شکار ہو چکے ہیں۔

پاکستان میں اپوزیشن اتحاد 'پاکستان ڈیموکریٹک موومنٹ‘ کی طرف سے ملک کے مختلف حصوں میں سیاسی جلسے منعقد کیے جانے کا سلسلہ جاری ہے۔ ایسے جلسوں میں شرکت کرنے والے عوام کورونا سے متعلق احتیاطوں پر عام طور پر عمل نہیں کرتے اور اسی سبب خطرات ظاہر کیے جا رہے ہیں کہ وہاں یہ وائرس زیادہ تیز رفتاری سے پھیل سکتا ہے۔

دوسری طرف پاکستان پیپلز پارٹی کے ایک سینیئر رہنما اور سابق وزیر قمر الزماں کائرہ میں بھی اس وائرس کی تصدیق ہوئی ہے جبکہ پاکستان مسلم لیگ نون کی نائب صدر مریم نواز کے شوہر اور پارٹی رہنما کیپٹن ریٹائرڈ محمد صفدر کا بھی کورونا ٹیسٹ مثبت آیا ہے۔