دنیا کے امیر ترین کرکٹ بورڈ کو مزید بیسیوں ارب کی آمدنی

بھارت کے تجارتی مرکز ممبئی سے منگل تین اپریل کو ملنے والی نیوز ایجنسی روئٹرز کی رپورٹوں کے مطابق دنیا میں آبادی کے لحاظ سے دوسرے سب سے بڑے ملک بھارت میں کرکٹ کا نگران ادارہ بی سی سی آئی (BCCI) دنیا کا امیر ترین کرکٹ بورڈ ہے، جو اس وقت بھارتی کرکٹ کے اگلے پانچ برسوں کے لیے نشریاتی حقوق کی نیلامی کرا رہا ہے۔

پاکستان میں بين الاقوامی کرکٹ کی واپسی

پاکستانی ننھے کرکٹر دنیا بھر میں  مشہور

آج منگل کے روز اس نیلامی کے دوران، جو ابھی جاری ہے، بی سی سی آئی کو انڈین کرکٹ کے ٹیلی وژن پر نشریاتی اور گلوبل ڈیجیٹل رائٹس کی خریداری کے لیے 44.4 ارب بھارتی روپے یا قریب 683 ملین امریکی ڈالر کے برابر قیمت کی پیشکش کی جا چکی تھی۔

بھارتی کرکٹ بورڈ کے جاری کردہ ایک بیان کے مطابق نیلامی کے دوران اب تک کی یہ سب سے بڑی بولی ایک ایسے ادارے نے لگائی تھی، جس کا نام صحت مند مقابلہ بازی کو یقینی بنانے کے لیے فی الحال ظاہر نہیں کیا جا سکتا۔ منگل کے روز کے لیے مختص کردہ نیلامی کا وقت پورا ہو جانے کے بعد اب یہی نیلامی کل بدھ چار اپریل کو جاری رہے گی، جس دوران یقینی طور پر اور بھی بڑی بولیاں لگائی جائیں گی۔

ٹی ٹوئنٹی، پاکستانی کرکٹ ٹیم ورلڈ رینکنگ میں اب پہلے نمبر پر

کرکٹ: بھارت نے انڈر نائنٹین ورلڈ کپ جیت لیا

ماضی میں قریب اسی طرح کی ایک نیلامی کے دوران 2012ء سے لے کر 2018ء تک بھارتی کرکٹ ٹیم کے اندرون ملک ہونے والے تمام بین الاقوامی میچوں کے نشریاتی حقوق خریدنے کے لیے سٹار انڈیا نامی ادارے نے بی سی سی آئی کو 38.5 ارب روپے ادا کیے تھے۔

اس کے علاوہ بی سی سی آئی نے دنیا کے امیر ترین کرکٹ بورڈ کے طور پر اپنی پوزیشن گ‍زشتہ برس ستمبر میں اس وقت اور بھی مضبوط بنا لی تھی، جب اس نے سٹار انڈیا نامی ادارے کو ہی انڈین پریمیئر لیگ یا آئی پی ایل کے عالمگیر میڈیا حقوق 2.52 ارب ڈالر کی ناقابل یقین قیمت کے عوض بیچ دیے تھے۔

آج شروع ہونے والی نیلامی میں بھارتی ٹیم کے جون 2018ء سے لے کر مارچ 2023ء تک کے عرصے میں بھارت میں کھیلے جانے والے 102 میچوں کے عالمگیر نشریاتی حقوق فروخت کیے جانا ہیں اور شروع میں اس نیلامی میں حصہ لینے کی خواہش مند چھ بڑی کمپنیوں میں فیس بک اور گوگل جیسے عالمگیر ادارے بھی شامل تھے۔ بعد میں بی سی سی آئی کی طرف سے جانچ پڑتال کے بعد ان چھ میں سے جن کمپنیوں کو آن لائن نیلامی میں حصہ لینے کی اجازت دی گئی تھی، ان میں اب فیس بک اور گوگل شامل نہیں ہیں۔

م م / ا م ت / روئٹرز