روسی بھارتی تجارت اور روپے کا مسئلہ

روس کی کوشش ہے کہ کسی طرح سے وہ راستے تلاش کیے جائیں جن کے تحت وہ بھارت کو فروخت کیے جانے والے خام مال سے محصولہ سرمایہ قابل استعمال بنا سکے۔

توانائی کا بحران: پاکستان کی نظریں روس اور امریکہ دونوں پر

پاکستان نے روسی خام تیل کا پہلا آرڈر دے دیا

یوکرینی جنگ کے بعد بھارت روس سے تیل خریدنے والا ایک بڑا ملک بن چکا ہے تاہم روس پر اس وقت شدید مغربی پابندیاں عائد ہیں، جس کی وجہ سے روس اپنا خام تیل سستے نرخوں پر فروخت کرنے پر مجبور ہے۔ اپریل میں بھارت کی جانب سے روس سے ریکارڈ تیل درآمد کیا گیا۔ گزشتہ ماہ ماسکو بھارت کو خام تیل برآمد کرنے والا سب سے بڑا ملک بن گیا ہے۔ خام تیل کی یہ سپلائی عراق اور سعودی عرب کی جانب سے بھارت کو فروخت کردہ مجموعی مقدار سے بھی زائد بنتی ہے۔

گزشتہ برس فروری میں یوکرینی جنگ سے قبل بھارت بہت قلیل مقدار میں خام تیل روس سے حاصل کرتا تھا۔ مگر روس پر مغربی پابندیوں اور اسے مالی ادائیگیوں کے مغربی نظام سے الگ کر دینے کے بعد روس کے لیے خام تیل کی فروخت ایک مسئلہ رہی ہے۔

گزشتہ ایک برس میں بھارت روس سے تیل کی ادائیگی بھارتی روپے میں کرتا رہا ہے، تاہمپابندیوں کی وجہ سے روسی کمپنیوں کے لیے بھارتی روپے کو استعمال کرنا ایک مشکل عمل ہے۔

روس سے سستے تیل کے حصول کی وجہ سے روس کے ساتھ بھارت کا تجارتی خسارہ بہت بڑھ چکا ہے۔ گزشتہ مالی سال میں روس سے بھارتی درآمدات کا حجم اکتالیس اعشاریہ پانچ ارب ڈالر تھا جب کہ اس کے بدلے میں روس کے لیے بھارتی برآمدات صرف دو اعشاریہ آٹھ ارب ڈالر کی تھیں۔

اس طرح روسی کمپنیوں کے بھارتی بینکوں میں کھاتوں میں اربوں روپے تو پہنچ گئے، مگر ان پیسوں کا استعمال روسی کمپنیوں کے لیے ایک مسئلہ بنا ہوا ہے۔ آبزرور ریسرچ فاؤنڈیشن سے وابستہ روسی امور کے ماہر نندن یونیرکشنن نے ڈی ڈبلیو سے بات چیت میں کہا کہ اگر فریقین اس معاملے کو حل نہیں کرتے تو اس کا اثر فقط تیل ہی نہیں ہر شے پر پڑے گا۔

روسی وزیرخارجہ سیرگئی لاوروف نے بھی شنگھائی تعاون تنظیم کے بھارتی ریاست گووا میں ہونے والے اجلاس میں یہ معاملہ اٹھایا تھا۔ ان کا کہنا تھا، ''ہمیں پیسے استعمال کرنا ہیں، مگر اس کے لیے یہ روپے کسی اور کرنسی میں منتقل کرنا ہوں گے۔ ہم اس موضوع پر گفتگو کر رہے ہیں۔‘‘

کہا جا رہا ہےکہ ادائیگیوں کے اس مسئلے کی وجہ سے بھارتی عسکری درآمدات کو بھی نقصان پہنچا ہے۔ یہ بات اہم ہے کہ روس اور بھارت کے درمیان دیرینہ سیاسی اور سکیورٹی تعلقات قائم ہیں۔

ع ت، ک م (شری نواس مزومدُرو)