طرابلس میں قذافی کے حامیوں اور حکومتی افواج کے درمیان لڑائی

لیبیا کے نئے حکمرانوں کو ایک نئی مشکل کا سامنا ہے۔ سابق رہنما معمر قذافی کے حامیوں نے نئی حکومت کی فورسز پر حملہ کیا ہے۔ گو کہ ان حملہ آوروں کی تعداد محض چند درجن بتائی گئی ہے تاہم طرابلس کے قذافی مخالفین کے قبضے میں آنے کے بعد یہ پہلا واقعہ ہے۔ خیال رہے کہ کئی ماہ تک جاری رہنے والی خانہ جنگی کے بعد اگست کے مہینے میں طرابلس پر قذافی مخالفین نے قبضہ کر کے اب روپوش معمر قذافی کے بیالیس سالہ اقتدار کا خاتمہ کر دیا تھا۔

جمعے کے روز سینکڑوں کی تعداد میں عبوری کونسل کے سپاہی اللہ اکبر کے نعرے لگاتے ہوئے شہر کے نواحی قصبے ابو سلیم میں داخل ہو گئے جہاں قذافی کے حامیوں اور ان کے درمیان فائرنگ کا تبادلہ ہوا۔

دریں اثناء قومی عبوری کونسل کی افواج قذافی کے آبائی شہر سرت پر ہنوز مکمل قبضہ نہیں کر سکی ہیں۔

عینی شاہدین نے طرابلس کی نئی صورت حال پر تبصرہ کرتے ہوئے بتایا کہ جمعے کے روز پچاس کے قریب مسلح افراد ابو سلیم نامی قصبے میں داخل ہوئے اور انہوں نے قذافی کے حق میں نعرے لگانا شروع کر دیے۔ عبوری کونسل کے اراکین کے مطابق بعض دیگر علاقوں میں بھی جھڑپیں جاری ہیں۔ کونسل کے ایک مسلح کارکن عبداللہ کا کہنا تھا، ’’گزشتہ شب قذافی نے اپنے ایک نئے پیغام میں لوگوں کو بغاوت کرنے پر اکسایا تھا۔ اسی باعث اب چند لوگ باہر نکل کر مسائل پیدا کر رہے ہیں۔‘‘

طرابلس میں تازہ لڑائی کے دوران قذافی کے دو حامیوں اور عبوری کونسل کے ایک سپاہی کے ہلاک ہونے کی بھی اطلاعات ہیں۔ قومی عبوری کونسل کے مطابق نئی انتظامیہ نے طرابلس میں ہائی الرٹ کر دیا ہے۔

لیبیا کے سابق رہنما معمر قذافی تاحال روپوش ہیں اور عبوری کونسل ان کی تلاش جاری رکھے ہوئے ہے۔

ایمنسٹی انٹرنیشنل نے اپنی ایک حالیہ رپورٹ میں کہا ہے کہ اسے اس بات کا خدشہ ہے کہ لیبیا کے نئے حکمران قذافی حکومت کی طرح انسانی حقوق کی وسیع پیمانے پر خلاف ورزیوں کا ارتکاب کر سکتے ہیں۔

رپورٹ: شامل شمس ⁄ خبر رساں ادارے

ادارت: مقبول ملک